Partidu Kmanek Haburas Unidade Nasionál Timor Oan (KHUNTO) deside retira hosi koligasaun ho partidu mais votandu Fretilín hodi forma VII Governu Konstitusionál ba períodu 2017-2022.

Konsileiru Partidu KHUNTO José do Santos Naimori Bucar hateten, desizaun retira obrigadu KHUNTO tenke halo tanba Partidu Fretilín la konsidera prinsipiu partidu KHUNTO nian.

ʺPrimeiru tenki kopera malu, respeita malu, entre lideransa partidu sira, ami kopera ho kualker partidu, ho partidu fretilín ami hein fulan ida to’o horiseik no ohin partidu fretilín la koopera ho ami ho ida ne’e ami hola desizaun hodi sai oposizaun,ʺ Naimori lamenta iha Konfrensia Imprensa, Kinta (14/09) iha Surikmas Dili.

Maske dada an ona hosi koligasaun tanba mosu dézentendimentu entre Fretilín ho KHUNTO maibé ba interese nasionál liu-liu atu hametin pás no estabilidade, KHUNTO promete sei fó kontribuisaun ba Estadu no Governu maske la involve iha governasaun.

Entertantu Naimori mós la haluha fó parabens ba pozisaun Sekretáriu Jerál Mari Alkatiri ne’ebé hetan ona fiar hosi Prezidente da Repúblika, Francisco Guterres Lú Olo hosi sai nu’udar Xefe Governu iha VII Governu durante mandatu tinan lima mai.

ʺAmi fó parabens ba Mari Alkatiri mesmu ami la tama iha Governu maibe ami fó apoiu nafatin atu kria estabilidade ba povu iha nasaun ida ne’e, atu lidera nasaun ne’e ho di’ak,ʺ Naimori hato’o.

Iha parte seluk, tanba KHUNTO retira ona hosi koligasaun ho Fretilín oras ne’e dadaun partidu Fretilín nian aliadu ba VII Governu mak Partidu Demokratiku (PD).

Forsa Koligasaun Fretilín ho PD iha parlamentu nasionál iha 30 kadeiras, entertantu opozisaun iha IV lejizlatura nia asentu hamutuk 35 kadeiras kompostu hosi Partidu CNRT ho asentu 22 kadeiras, Partidu Libertasaun Popular (PLP), asentu parlamentar 8, KHUNTO 5.

tatoli.tl