Konfrontu entre joventude iha
Dili laran komesa alastra ba bei-beik ona. Kuaze kalan-kalan, jovens
sira buka malu no tuda malu no mos hana malu.
Iha Tersa kalan (10/10/2017), akontese
tan konfrontus hanesan iha Aldeia Rio de Janairo, Suku Bairo Pite, Posto
Administrativu Dom Aleixo, Munisipiu Dili, hodi rezulta uma ida (1) ho
kareta rua (2) tahun.
Markita da Silva, nudar vitima sente
triste tebes tanba konfrontu ne’ebe involve joventude sira iha Bairo
Pite rezulta nia uma ho kareta rua estragus.
“Ami la hatene buat ida kona-ba problema
ne’e, maibe triste boot ami mak simu todan tanba uma ho kareta 2 mak
rahun,” hateten Markita ba GMN iha nia hela fatin, Rio de Janeiro,
Kuarta (11/10/2017).
Markita da Silva nudar vitima hato´o ona
keisa ba parte ofisial polisia suku (OPS) no autoridade lokal hodi buka
solusaun para bele hadia fila fali sasan sira ne´ebe mak hetan ona
estragus husi konfrontusaun entre joventude.
Iha fatin hanesan, Xefe Aldeia Rio de
Janeiro, Gaspar Saldanha Soares promete sei buka solusaun hodi rezolve
problema ne´ebe mak akontese.
“Ha´u tun mai atu halo mediasaun maibe masa barak serang malu
tiha ona,ha´u labele dehan parte ne´e mak vitima, parte ne´eba mak
vitima ami sei tur hamutuk halo mediasaun buka solusaun para vizinu sira
ne´ebe mak sasan rahun ne´e, oinsa mak bele hadia,” Gaspar hateten.
Segundu Komandante Polisia Nasional
Timor Leste (PNTL) Munisipiu Dili, Superintendenti Assistenti Euclides
Belo, hateten, momentu ne’eba Polisia Eskuadra Dom Aleixo halo kedas
intervensaun no konsege kaptura joven nain rua ne´ebe deskonfia involve
iha konfrontu ne´e.
Euclides
Belo hateten, polisia seida´uk identifika motivu lolos husi kazu ne´e
no kontinua halo identifikasaun ba volume estragus ne´ebe mak iha hodi
relata ba Komando.
Nia husu ba sidadaun hotu nia kontribuisaun atu bele asegura seguransa iha bairo laran.
“Iha ema ruma mak provoka no tenta kria
instabilidade, favor informa hela mai polisia atu halo atuasaun
emidiata,” hateten Euclides.
Apela joven sira tuur hakmatek
Husi parte seluk Vise Xefi Estadu Maior
Jeneral das F-FDTL, Brigadeiru General Filomeno da Paixão de Jesus, husu
ba joven sira atu tuur hakmatek, iha ida-idak nia fatin.
Filomeno Paixão hato’o apelu ne’e ba
povu Timor Leste tomak, hafoin hasoru malu ho Prezidenti Repúblika
Francisco Guterres Lú Olo, iha Palácio Prezidenti Nicolau Lobato Bairo
Pite Kuarta feira (11/10) horseik.
Filomeno Paixão hateten, situasaun
polítika ohin loron ne’e, iha ona formasaun Governu, tanba ema hotu-hotu
tenki tau fiar ba maun boot rua Mari ho maun boot Xanana.
“Ita tau fiar ba sira, ida ne’e ami bolu
atensaun ba populasaun sira, liu-liu ba joven sira atu hakmatek iha
fatin, no ita lalika ba halo tan problema iha kraik ne’ebá hein mak
lider sira rezolve situasaun,” dehan Filomeno Paixão.
Nia dehan, situasaun tensaun politika
iha rai laran ne’e normal, tanba iha país demokrátiku sira hotu, hanoin
ne’ebé la hanesan sempre akontese.
“Ami simu duni diretiva polítika husi
Ministru Defeza para aumenta tan patrullamentu iha territóriu tomak,
liu-liu iha sidade Díli hodi fó apoiu ba PNTL nia atuasaun kontra
posível problema ruma ne’ebé akontese,” Filomeno hatutan.
Nia hateten, ba problema ne’ebé mosu iha
públiku polisia mak tenki hola medidas atu halo atuasaun no F-FDTL sei
fó apoia kuandu iha situasaun ne’ebé grave liu ona, maibé tenki iha
konsensu uluk husi governu no prezidenti.
*gmntv.tl
No comments:
Post a Comment