Membru VII Governu Konstitusionál partisipa iha Prosisaun Nossa Senhora Aitara

S.E Primeiru-Ministru, Dr. Marí Alkatiri, ho membru VII Governu Konstitusionál partisipa iha enseramentu ba eventu espiritual ne’ebé tinan tinan halo prosisaun Santuário Nossa Senhora Aitara, iha Soibada, Munisípiu Manatuto.

Iha partisipasaun ne’e Primeiru-Ministru hatete VII Governu sei kaer saida mak kultura reprezenta ba patriotizmu no saida mak relijiaun reprezenta ba kultura.

“Relijiaun Katólika hanesan elementu determinante ida para atu marka ita nia identidade no marka ita nia kultura” afirma Primeiru-Ministru Dr. Marí Alkatiri.

Xefi Governu realsa tan katak kultura ho identidade importante tebes atu hametin Timor-Leste ninia soberania tanba ne’e Soibada sei sai sentru enterasaun kultural ida ne’ebé firma identidade Timor-Leste.

Ha’u (PM) husu ba populasun Soibada tau matan ba uma antigu sira no buat hotu ne’ebé iha labele sobu. Hirak ne’e hotu hanesan kultura materiál, sentru istória ne’ebé hatudu ita nia identidade tomak.

Ikus liu Premeiru-Ministru agradese ba konvite ne’ebé hetan hamutuk ho membru governu VII nian hodi partisipa iha prosisaun Santuário Nossa Senhora Aitara.

Partisipa iha serimónia ne’e nain ulun igreja parokia tolu iha Timor-Leste, sarani tomak Soibada inklui mós estudante universitáriu sira.

*Mídia GPM