PNTL ho F-FDTL Alerta Hakmatek

Majór Jenerál FALINTIL-Forsa Defeza Timor-Leste (F-FDTL), Lere Anan Timur ho Komandante Jerál Polísia Nasionál Timor-Leste (PNTL), Júlio da Costa Hornay alerta ba públiku atu hakmatek ho situasaun polítika debate Programa Governu Da-hituk iha Parlamentu Nasionál (PN).

“Kuandu grupu balun hakarak koko atu hamosu konflitu tanba la satisfas ho situasaun polítika hodi hamosu instabilidade, ho koordenasaun PNTL ho F-FDTL prontu atua situasaun ho rigór”, afirma KomJer PNTL, Komisáriu Júlio Hornay durante Konferénsia Imprensa iha Kuartél Jerál PNTL Kaikoli, segunda, (16/10).

PNTL ho F-FDTL nu’udar aparellu Estadu iha ámbitu seguransa ho defeza. “Ami nia kompromisu hodi servisu hamutuk, apoiu malu, kria estabilidade, pás iha kualker aktu krime”, afirma. Hatutan: “Ami preparadu hodi hasoru se de’it mak hakarak koko hodi kria instabilidade ka perturbasaun ruma iha nasaun ne’e”.

Entretantu, Lere Anan Timur husu ba osan mean nain tolu eh karismátiku sira hanesan Kay Rala Xanana Gusmão, Marí Alkatiri no José Ramos Horta atu túr hamutuk hodi lori nasaun ne’e ba oin.

Ulun boot forsa defeza ne’e husu ba maun nain tolu, hosi planu externu no internu ka planu frente armada, diplomátika no klandestina túr hamutuk.

Nune’e mós husu ba intelektuál hotu atu hanoin didiak kona-ba konsekuénsia hosi eleisaun antesipada kuandu governu ne’e monu. “La’os sira tur leten mak lori todan maibé ema kiik mak sei sofre”.

*tatoli.tl