PNTL kaptura autor ne’ebe deskonfia produs rama ambon

Polisia Nasional Timor Leste (PNTL), foin lalais ne’e, kaptura ona autor ne’ebe deskonfia produs rama ambon iha Dili.  maske nune’e, PNTL seidauk bele indika pesoal refere mak autor tanba sei iha hela investigasaun.

Segundu Komandante PNTL Munsipiu Dili, Superintedente Asistente Euclides Belo, informa katak, prosesu investigasaun kontinua la’o hela tanba ne’e sei presiza rekolanha tan evidensia balun.

Hatan ba jornalista sira iha Sede Suku Bemori, Dili, Kinta (12/10/2017), Euclides Belo klarifika katak, parte polisia seidauk serteza identifika autor produs rama ambon tanba sei rekolha hela informasaun iha fatin sira ne’e.

“Agora ami  sei suspeita hela signifika sira iha ne’e, ami seidauk fo serteza resposta klaru ba sira, maibe ami konfia sira (servisu informasaun,red) ninia knar, ami sei informasaun valida ba ita boot sira,” hateten Euclides Belo.

Segundu komandante polisia munsipiu Dili,Euclides Belo mos la fo klaru kona-ba autor hira mak deskunfia involve iha produsaun rama ambon.

Hatan mos kona-ba autor ne’ebe lori rama ambon hodi hana ema iha sidade Dili parte polisia kaptura ona ka seida’uk, Euclides Belo garante katak iha tempu badak sei kaptura autor sira ne’e.

Opurtunidade ne’e, Segundu Komandante PNTL Munsipiu Dili, Euclides Belo, informa kona-ba kazu tá joven nain ida iha area Taibessi, identifikadu ona suspeitu,  maibe sei hein mandadu kapturasaun husi Ministeriu Publiku.

“Suspeitu identifika ona para ami bele kaer, ami sei promove hotu auto de notisia ba Ministeriu Publiku para servisu bele klean liu,” hateten Euclides Belo.

*gmntv.tl