Prezidenti
Partidu Libertasaun Popular (PLP) Taur Matan Ruak, hateten,
konstituisaun lahateten dehan, opozisaun mak tenki salva VII governu
konstitusional, tanba ne’e, opozisaun sei hala’o nia kna’ar tuir saida
mak konstituisaun hateten ona.
Eis Xefi Estadu ne’e mós konsidera, liafuan ida salva Governu ne’e,
atu halo populasaun sira ne’ebé lahatene ne’e bele rona, maibé razaun
la’os mak ida ne’e, opozisaun tenki atua bazeia ba konstituisaun.
Espekulasaun informasaun ne’ebé la’o, kona ba razaun ne’ebé halo kona
ba negosiasaun ho PLP no FRETILIN, maibé kotu iha dalan klaran.
Prezidenti PLP ne’e mós dehan, agora dadauk Governu minoria, no iha
konstituisaun mós lahaten dehan, opozisaun mak tenki salva Governu.
“Iha konstituisaun lahateten dehan, atu salva Governu tenki iha
sentidu Estadu, partidu opozisaun sira agora no ba oin, ami sei atua
dentru limite konstituisaun hateten, no konstituisaun la’os ha’u mak
halo, maibé FRETILIN mak halo, entaun sira hatene liu regras no sistema,
agora ami uza ida ne’e para joga,” dehan Taur Matan Ruak ba jornalista
sira iha nia rezidensia Metiaut Dili, Kuarta (11/10), bainhira hala’o
enkontru hamutuk ho jornalista sira hotu.
Nia hatutan, liafuan ida salva Governu ne’e, atu halo populasaun sira
lahatene ne’e, bele rona, maibé razaun la’os mak ida ne’e, opozisaun
tenki atua bazeia ba konstituisaun.
Taur Matan Ruak dehan, Prezidenti Repúblika fó ona responsabilidade
ba sira, entaun agora ba oin sira tenki hatudu fali ba Prezidenti
Repúblika katak, sira bele duni.
“Opozisaun la’os obrigadu, laiha obrigadu tanba opozisaun hateten
klaru ona, iha artigu 106 ita tenki la’o tuir. Ha’u nia orientasaun ba
ha’u nia partidu PLP iha Parlamentu ida de’it, halo buat hotu ne’ebé
konstituisaun haruka, no labele halo buat ne’ebé konstituisaun
laharuka,” katak Taur.
Eis Xefi Estadu ne’e mós lakohi atu hateten katak, programa Governu
nian sei la pasa iha Parlamentu Nasionál, tanba programa ne’e seidauk
deskuti.
“Balu dehan ami mak hakarak fatin, no espekulasaun ne’e barak los.
Entaun ohin ha’u hakarak aproveita oportunidade atu esklarese oit uan
kona ba problema ida ne’e. pergunta ne’ebé mak ita halo, negosiasaun
ne’e la’o oinsa, no se mak sai uluk husi negosiasaun ne’e,” afirma Taur
Matan Ruak.
Eis
Prezidenti Repúblika ne’e afirma, rezultadu eleisaun parlamentar, laiha
partidu ida mak manan maioria absoluta. Entaun partidu primeiru
vensedor eleisaun FRETILIN, fó konvite ba partidu hirak ne’e atu halo
negosiasaun ba formasaun Governu.
“Maske depois eleisaun, ami hateten katak, ami hakarak ba opozisaun,
tanba ami prefere liu ba opozisaun, maibé ami mós hatene para FRETILIN
bele la’o tuir, no ami mós hatene katak, nia bele ba CNRT, mai PLP no
dalan seluk mak PD ho KHUNTO,” afirma Taur Matan Ruak.
Entaun iha momentu ne’eba, PLP enkontru ho FRETILIN hodi ko’alia kona
ba koligasaun iha loron 15 Agostu, no iha media nia oin, Taur Matan
Ruak rasik hateten, PLP pronto koliga ho FRETILIN.
“Kuandu ami anunsia ida ne’e, ami nia partidu mós prepara-an atu
negosia ho FRETILIN. Ami haree orientasaun saida mak orienta, bainhira
ami ko’alia, pontu saida mak importante ami ko’alia ho sira, no durante
negosiasaun ne’e, prontu kritikus ne’ebé halo akordu ne’e lahetan
solusaun mak saida,” relata Taur Matan Ruak.
Nia afirma, iha negosiasaun ne’e, PLP hakarak tratamentu ne’e
hanesan, FRETILIN labele hateten dehan, sira mak kadeira barak liu, PLP
ki’ik, tanba FRETILIN mak presiza PLP, la’os PLP mak presiza FRETILIN.
“Ami hakarak solusaun ida win-win solution katak, solusaun ida
FRETILIN mós manan, ami mós manan. Modalidade ba Governasaun, FRETILIN
ko’alia tolu dala ida hanesan, koligasaun, inkluzaun no insidensia
Parlamentar, maibé ami hakarak diskuti de’it mak koligasaun,” katak
Taur.
Taur esklarese, agora FRETILIN mai PLP ko’alia koligasaun, ba KHUNTO
ko’alia koligasaun, ba PD ko’alia inkluzaun no ba CNRT ko’alia
insidensia Parlamentar.
“Entaun
ida ne’e pontu ida ne’ebé ha’u bolu dehan, pontu risku. Entaun iha
negosiasaun nia laran, ha’u husu, Sr. Mari ita bo’ot hakarak los saida?,
tanba mai ami dehan koligasaun, ba PD ko’alia inkluzaun, ba
CNRTinsidensia parlamentar. Tanba saida mak ha’u husu ida ne’e, tanba
sira bele so’e ami, nia ba CNRT de’it, partidu hira ne’e la serve ona.
Tanba ne’e, Taur Matan Ruak dehan, PLP iha prinsipiu, kuandu
koligasaun, entaun diskuti koligasaun, kuandu insidensia Parlamentar,
tenki ko’alia ida.
“Tanba ne’e mak ami husu, FRETILIN mai ne’e ho intensaun diak ka
la’e, hakarak duni hetan solusaun ka, mai aproveita de’it. Kona ba
polítika no programa, FRETILIN fó dokumentu ida mai hodi sai hanesan
baze para ami haree. Entaun ami nia ekipa teknika sira diskuti ho sira
para haree, no iha pontu ida kona ba modalidade Governasaun mak ami la
konsege hetan konsensu, tanba sir a hakarak ko’alia buat tolu ne’e
hotu,” relata Taur Matan Ruak.
Entaun, Taur Matan Ruak esplika, iha momentu ne’aba Parlamentu Nasionál tenki hamrik ona, entaun mantein nia pozisaun.
“Ha’u hateten ba Sr. Mari Alkatiri dehan, PLP sei la ajuda FRETILIN
atu hetan poder tolu ne’e dala ida. Prezidenti Repúblika uluk kandidatu
FRETILIN no Prezidenti FRETILIN, maibé agora sai ona Prezidenti ba povu
tomak, Primeiru Ministru FRETILIN nian, Prezidenti FRETILIN nian nian,
ami labele apoia, no ha’u hateten dehan, ida ne’e ami la apoiu, no ami
husu para Prezidenti Parlamentu fó ba partidu seluk,” katak Taur Matan
Ruak.
Maibé iha momentu ne’eba, Alkatiri hateten ba Taur Matan Ruak katak,
karik kaniddatu Prezidenti PN mak mai husi PLP, FRETILIN nia deputadu
balu bele la vota ba kandidatu ne’e.
“Entaun maske ami seidauk diskuti klean, maibé iha momentu ne’eba ami
dehan, partidu ida istóriku no partidu ida iha disiplina maka’as, halo
nusa mak dehan fali labele vota ba ita, kuandu nia presiza ita nia votu
entaun ida ne’e ami haree katak, buat ruma lalos iha ne’e. Entaun tanba
ami levanta pontu rua ne’e atu diskuti, iha loron 2 fulan Setemru, sira
sai ba fali PD,” relata Alkatiri.
Taur
dehan, ho PD sira hetan akordu ida hodi asina, inklui mós KHUNTO, no
sira husik hela PLP iha kotuk. Iha momentu ne’eba bainhira jornalista
husu ba Mari Alkatiri, nia hateten katak, husu fali ba PLP, ida ne’e
lalos, tanba FRETILIN mak sai husi negosiasaun ne’e.
“Ha’u halo negosiasaun barak, ho Indonesia mós ha’u halo, entaun ha’u
hatene saida mak ha’u halo. Maibé sira halo inisiativa husik ami, hodi
ba fali PD ho KUNTO, hetan ona maioria, la presiza ona PLP, entaun ami
mós sai. Maibé problema mosu fali bainhira KHUNTO mós dada an, entaun
sira komesa dehan fali ami mak sala,” katak Taur.
Taur haktuir, fó sala ba PLP ne’e lalos, tanba negosiasaun seidauk
hetan solusaun, FRETILIN haksoit fali ba partidu seluk, hodi haluha tiha
PLP, entaun PLP mós laiha ona tempu atu halo fali diskusaun kona ba ida
ne’e.
“Agora KHUNTO sai, sira hakarak mai fali, ha’u dehan la’e, ami laiha
ona tempu atu lakon tempu, tanba ha’u ba atu beabiliza Governu FRETILIN
nian, la’os ami mak forma Governu, maibé to’o ikus imi ba fali partidu
ida mamar ne’e, ida ne’ebé to’os imi ses tiha,” afirma Taur.
Tanba ne’e Taur Matan Ruak dehan, negosiasaun ba formasaun VII
Governu ne’e, kotu tanba FRETILIN mak dada an, tanba la hetan konsensu
ba modelu Governasaun, no Prezidenti Parlamentu Nasionál, tanba PLP la
konkorda atu FRETILIN okupa hotu orgaun tolu ne’e.
“Pergunta ne’ebé hatete dehan, sei iha posibilidade para ami atu
negosia tan, ida ne’e laiha ona, ami opozisaun nafatin,” dehan Taur
Matan Ruak.
*gmntv.tl
Taur la garante opozisaun salva governu
Subscribe to:
Post Comments (Atom)
NUDAR ESPASU ALTERNATIVU HUSI MEDIA ONLINE OIN OIN NEBE DISPONIVEL ONA IHA TIMOR-LESTE HODI AKUMULA OU TAU HAMUTUK NOTISIA IMPORTANTI SIRA, HO OBJETIVU ATU HAFASIL LIU TAN LEE NAIN SIRA BELE HETAN NOTISIA SIRA NEE IHA FATIN IDA DEIT, MAK INFO-TL.
MERITU HUSI ARTIGU SIRA NEE NAFATIN BA MEDIA ONLINE SIRA NEBE PRODUZ NOTISIA NEE!!!
REDASAUN INFO-TL
MERITU HUSI ARTIGU SIRA NEE NAFATIN BA MEDIA ONLINE SIRA NEBE PRODUZ NOTISIA NEE!!!
REDASAUN INFO-TL
No comments:
Post a Comment