Taur: Se mak tuir ha’u ho Xanana, sei monu hotu

Prezidenti Partidu Libertasaun Popular (PLP), Taur Matan Ruak, hateten, relasaun entre nia ho Prezidenti partidu CNRT, Kay Rala Xanana Gusmão laiha problema.

“Ami na’in rua ne’e, iha ailaran kedas hirus malu, diak malu fali, mas se mak tuir ami ne’e, sira mak monu hotu,” katak Taur Matan Ruak iha nia rezidensia Metiaut Dili, Kuarta (11/10), bainhira hala’o enkontru hamutuk ho jornalista sira.

Tanba ne’e, Taur Matan Ruak husu ba povu Timor Leste tomak atu labele monu ba polítika ida ne’e.

Taur Matan Ruak mós kontenti ho liafuan ne’ebé Kay Rala Xanana Gusmão hato’o ba nia iha nia aniversariu ba tinan 61 iha loron 10 fulan fulan Outubru tinan ida ne’e.

Hatan kona ba liafuan parabens ne’ebé Prezidenti CNRT, Kay Rala Xanana Gusmão hato’o ba nia bainhira nia halo aniversariu ba tinan 61, Taur Matan Ruak dehan, nia kontenti tebes ho asaun Xanana Gusmão nian ne’e.

Tanba ne’e, Taur Matan Ruak hato’o nia agradesementu ba Kay Rala Xanana Gusmão, ba hahalok ne’ebé nia hatudu liu husi mensajen ne’e.

“Ha’u hateten bebeik ona, hahalok ida vale liu liafuan rihun ida. Ninia (Xanana) mensajen mai ha’u ne’e, ko’alia liafuan karik, semana ida nian tomak, buat hotu iha ona ne’eba.  Ha’u hanesan alin kompañeiru da luta, sensibilizadu ba nia jestu,” relata Taur Matan Ruak.

Tanba ne’e, Taur Matan Ruak husu ba povu atu lalika monu tuir  jestu ninian ho Xanana Gusmão nian ne’e, tanba sira na’in rua toman malu ona desde iha ailaran tempu sei difisil.

*gmntv.tl