Iha sorumutu ho sosiedade sivíl no ONG sira semana ida ne’e, Primeiru Ministru Governu Minoria Dr. Mari Alkatiri ko’alia katak FRETILIN forma governu minoria tanba Xanana Gusmao maka haruka atu forma mezmu nia rasik mós tuir loloos la barani atu kaer governu ida minoria.
Deklarasaun ida ne’e la’ós buat foun maibé Dr. Mari Alkatiri hahú ko’alia iha loron ida antes atu tama ba votasaun ba programa governu nian iha 18/10/2017. Dr. Mari Alkatiri deklara iha Parlamentu Nasional katak: “Irmaun Xanana maka haruka ha’u forma Governu ida ne’e tanba nia atu apoiu, se la fiar Irmaun Xanana fila maka ha’u sei ko’alia fali ho nia”.
Maibé iha kalan ne’e kedas hafoin remata plenária, Kay Rala Xanana nudár Prezidente Partidu CNRT halo kedas video call ida ba iha Bankada CNRT no asiste diretamente husi Xefe Bankada PLP no KHUNTO hodi dezmente deklarasaun husi Dr. Mari Alkatiri no afirma katak Xanana nunka haruka Dr. Mari Alkatiri atu forma governu ida minoria.
Kay Rala Xanana liuhosi video call ne’e husu ba bankada tolu atu mantén pozisaun nudár opozisaun no halo knar tuir opozisaun nia devér hodi kumpre no defende valor Konstituisaun RDTL no tane aas espíritu demokrasia. Bazeia ba orientasaun ida ne’e maka bankada opozisaun ne’ebé forma husi partidu tolu ho firme vota afavór ba mosaun rejeisaun ba programa VII Governu nian.
Afirmasaun Kay Rala Xanana nian katak nia nunka haruka Dr. Mari Alkatiri atu forma governu minoria ne’e maka justifika liuhosi karta ne’ebé haruka ba Prezidente Repúblika iha loron 11/9/2017. Iha karta nee Xanana Gusmao husu ba Prezidente Repúblika katak CNRT mantén ba opozisaun no so apoiu FRETILIN bainhira FRETILIN hili entre koligasaun, inkluzaun, no insidénsia parlamentár. Maibé hare ba FRETILIN nia pozisaun ne’ebé inserteza tanba hakarak hili opsaun tolu ne’e hotu maka CNRT deside atu la fó apoiu.
Ikus mai, tanba inserteza FRETILIN nian ba opsaun tolu ne’e maka Partidu PLP deside retira an no Partidu KHUNTO mós dada an iha minutu ikus antes atu asina akordu koligasaun. Ikus mai tanba Partidu PLP ho KHUNTO retira ona maka FRETILIN la iha tan opsaun seluk maibé bolu PD hodi forma Governu minoria ho kadeira 30.
Tanba ne’e husu ba públiku atu labele fiar deklarasaun polítika sein evidénsia ne’ebé Dr. Mari Alkatiri soe ba públiku hodi tau todan ba Prezidente CNRT ba formasaun Governu minoria ne’ebé la garante estabilidade governativa ba tinan lima oin mai.
@ FB CNRT media center
Forma Governo tuir Konstituisaun la os tuir fali Sr. Xanana nia mandato tanba Nasaun ida ne'e iha Lei nebe'e maka konsagra ona iha Konstituisaun RDTL no Nasaun ne'e ema hotu nian.
ReplyDelete