Primeiru Ministru (PM) Mari
Alkatiri, informa katak, Kay Rala Xanana Gusmão, prontu ona atu asumi
kargu Prezidente Alta Autoridade ba Asuntu Delimitasaun Fronteira
Marítima no Projetu Tasi Mane.
“Xanana resposta ona proposta ne’ebé VII
Governu fó, resposta iha ona maka ha’u dehan pozitivu ne’e, karik
negativu ha’u dehan seidauk resposta,” PM ba jornalista sira hafoin
remata reuniaun kona-bá situasaun jeral iha Timor-Leste, hanesan
situasaun polítika, sosial, ekonómika, aprezenta programa no lista final
membru Governu ba PR iha Palasiu Prezidensial, Bairo Píte-Díli, Kinta
(12-10-2017).
Nia esplika katak, Xanana Gusmão ne’e
la’os membru Governu, maibé hanesan alta autoridade ida ne’ebé maka sei
responsabiliza projetu Tasi-Mane ninian.
“Atu fó tomada de pose ba Xanana ne’e
programa VII Governu tenki liu lai, sai ona Governu ida ne’ebé kompletu
ona, Governu tenki halo dekretu lei ida para kria estatutu ida ba
autoridade projetu Tasi-Mane,” dehan Mari Alkatiri.
Nia akresenta katak, tanba programa VII
Governu pasa maka Governu foin aprova dekretu lei hodi regula alta
autoridade ne’e hanesan instituisaun ida ho ninia autonomia finanseira
no patrimonial, depois maka bele nomeia Xanana no Prezidente Repúblika
nomeia em pose.
“Ne’e kreatividade halo ita atu haree
took estatutu foun ida ba Xanana, tanba ita presiza nia hala’o nafatin
servisu ne’ebé maka nia halo ona ba fronteira no hahú projetu boot ida
iha Tasi-Mane ninian, tanba ne’e maka ita fó kondisaun para nia bele
servisu,” relata PM Mari.
*gmntv.tl
No comments:
Post a Comment